Complete Vocal Technique
Rebekka Sif hóf nám við Complete Vocal Institute í Kaupmannahöfn haustið 2017. Hún lauk þar kennaraprófi vorið 2020 en hún hafði áður lokið 14-vikna söngtækni námi við sama skóla árið 2012.

​Allir geta lært að syngja eru einkunnarorð Complete Vocal Technique. Við eigum að geta fræmkvæmt öll þau hljóð sem við viljum á heilbrigðan hátt. Hægt er að fara í einkatíma hjá henni í gegnum Klifið í Garðabæ. Tímarnir eru sniðnir að hverjum og einum nemanda sem fær að ráða ferðinni eftir því hver óskin er í hvert sinn. Söngvarinn kemur í tíma með lag sem hann vill vinna með, en ásamt því verður farið í grunntækni eins og stuðning, raddbeitingu og framkomu. Tímarnir henta bæði byrjendum og þeim sem eru lengra komnir. 

Klifið

Rebekka hefur starfað sem söngkennari hjá Klifinu frá haustinu 2014. Hún hefur kennt skapandi söngnámskeið fyrir börn á aldrinum 5-11 ára og svo einkatíma ætlaða öllum aldri frá árinu 2018.

Á söngnámskeiðum Klifsins fá nemendur tækifæri til að læra einsöng og að syngja með öðrum. Hópurinn semur í sameiningu lag sem er flutt á tónleikum fyrir foreldra og aðstandendur nemenda í lok námskeiðsins. 

,,Nær að laða fram það besta í börnunum"

- Ásta Sölvadóttir og Ágústa Guðmundsdóttir, framkvæmdastýrur Klifsins.

Dýnamík

Rebekka Sif vinnur sem söngkennari hjá Dýnamík sviðslistaskóla þar sem hún kennir söngleikjasöng. Á námskeiðinu eru sungin söngleikjalög og farið er í undirstöður í söng- og raddtækni byggða á Complete Vocal Technique ásamt því að lögð er mikil áhersla á framkomu og leikræna tjáningu í söng. Farið er í öndun, stuðning, slaufur og hvernig á að syngja langar og sterkar nótur.

Sönglist

Rebekka vann sem söngkennari hjá Sönglist frá 2013-2021. Þar kenndi hún bæði byrjenda-, framhalds- og listhópum söngtækni og framkomu. En svo skemmtilega vill til að hún er sjálf leiklistar- dans og söngmenntuð frá skólanum sem hún stundaði árin frá 8 - 16 ára aldurs.

Söngstjórn/Raddþjálfun

Skoppa og Skrítla

Rebekka hefur séð um raddþjálfun barna í nokkrum leiksýningum á vegum Skoppu og Skrítlu. Nýlegast var það sýningin þeirra í Hörpu í október 2019. Sýningin var sett upp í tilefni af 15 ára afmæli persónanna og byggir á öllu því besta sem þær vinkonur hafa verið að bralla sl ár. Hún sá einnig um raddþjálfun barnanna í sýningunni Jólahátíð Skoppu og Skrítlu veturinn 2013. Sýningin hefur verið geisivinsæl og var tekin upp aftur í Borgarleikhúsinu veturinn 2014. 

Cry Baby - Uppsetning Garðaskóla

Nemendafélag Garðaskóla í Garðabæ setti upp söngleikinn Cry Baby sem var unninn upp úr samnefndri bíómynd. Leikstjóri var Dominique Gyða Sigrúnardóttir en Rebekka Sif fór með söngstjórn ásamt því að taka leikarana í raddþjálfun. Söngleikurinn var sýndur 10 sinnum í apríl 2016 og fékk mjög góðar móttökur. 

Jólaleikrit Borgarbarna

Rebekka hefur verið söngstjóri í þremur uppsetningum hjá Börgarbörnum. Borgarbörn settu upp jólasöngleik fyrir börn og unglinga á hverju ári við frábærar undirtektir. Rebekka sá um raddþjálfun og söngstjórn í jólasöngleikjunum Ferðin til jólaandans (2015), Mömmu Gjé (2014) og Jólanótt Viktoríu (2013).